Mércores, 15 de Setembro de 2021
15/09/2021: Reserva de Biosfera Ribeira Sacra e Serras do Oribio e Courel
O territorio da Ribeira Sacra e das serras do Oribio e Courel declarado pola UNESCO como Reserva de Biosfera
Galicia conta con unha nova Reserva de Biosfera: Ribeira Sacra e as Serras do Oribio e Courel O Comité Internacional de Cordinación ( CIC) do programa Home & Biosfera, aprobou a declaración do territorio de Ribeira Sacra e as Serras do Oribio e Courel como Reserva de Biosfera.
O mercores 15/09/2021, na 33 reunión plenaria do Comité Internacional de Cordinación ( CIC) do programa Home & Biosfera (M&B) celebrada conxuntamente entre Paris (Francia) e Abuja (Nixeria), aprobouse a sétima Reserva de Biosfera de Galicia.
Durante a súa intervención por videoconferencia para defender a candidatura ante o órgano reitor do M&B, a conselleira de Medio Ambiente, Territorio e Vivenda, Ángeles Vázquez, subliñou a importancia desta decisión tanto para os 23 municipios incluídos na mesma —18 da provincia de Lugo e 5 da de Ourense cunha poboación total de máis de 75.000 habitantes— como para o conxunto de Galicia.
Así, lembrou que coa incorporación da sétima reserva da biosfera, a superficie que conta en Galicia con este recoñecemento internacional increméntase ata chegar a case o 35% de todo o territorio; pero tamén suporá que o 42% da Comunidade quede amparado baixo algunha figura de protección, afianzando o recoñecemento á riqueza do noso patrimonio natural en todo o mundo.
De feito, a Reserva de Biosfera Ribeira Sacra e Serras do Oribio e Courel é a segunda máis grande da Comunidade, xa que abarca unha superficie total de 306.534,77 hectáreas que se estende polos canóns do Sil e polo río Miño e destaca pola súa gran beleza natural e pola riqueza cultural e etnográfica que atesoura.
Tras a proclamación hoxe por parte da UNESCO, este territorio intégrase oficialmente na Rede Mundial de Reservas de Biosfera e súmase aos outros seis que contaban xa en Galicia con este recoñecemento: Terras do Miño; Área de Allariz; Os Ancares Lucenses e Montes de Cervantes, Navia e Becerreá; Río Eo, Oscos e Terras de Burón; Transfronteiriza Gerês-Xurés; e Mariñas Coruñesas-Terras do Mandeo.
Precisamente, a conselleira lembrou tamén que en base á experiencia adquirida e tendo en conta as accións levadas a cabo nas outras reservas da biosfera galegas, a Xunta liderou un plan de acción que tiña como eixos fundamentais a conservación da biodiversidade, a restauración e mellora dos ecosistemas, o fomento do uso sostible dos recursos naturais, a mitigación do cambio climático e a promoción dunha sociedade sostible e plenamente integrada coa súa contorna.
Na mesma liña, subliñou o carácter participativo do proxecto impulsado a finais do ano 2017 para lograr a proclamación da Reserva de Biosfera Ribeira Sacra e Serras do Oribio e Courel, un “proxecto de país”, dixo, que agora toca poñer en práctica e materializar.
Tras agradecer o traballo e a implicación de todas as administracións, institucións públicas e privadas e colectivos e axentes sociais que contribuíron nestes anos ao éxito da candidatura, a conselleira resaltou a necesidade de seguir apostando polo mesmo modelo participativo para poñer en marcha, a futuro, un proxecto que harmonice a conservación deste territorio co seu imprescindible desenvolvemento sostible, tanto desde o punto de vista económico como social.
Case catro anos de traballo
A candidatura da Ribeira Sacra e Serras do Oribio e Courel a reserva da biosfera culminou hoxe un longo camiño, impulsado e liderado desde o principio pola Xunta de Galicia e que se concretou a comezos do ano 2019 nunha primeira proposta, elaborada coa colaboración do Instituto de Biodiversidade Agraria e Desenvolvemento Rural (IBADER) da Universidade de Santiago de Compostela e da Fundación Juana de Vega.
Tras un longo proceso de participación pública e unha vez superado o trámite ante o Comité Español do Programa M&B, que en novembro de 2020 avalou a candidatura por unanimidade e decidiu seguir adiante coa súa tramitación, a proposta para declarar reserva da biosfera a Ribeira Sacra chegou a mans do órgano consultivo internacional da Unesco hai uns meses, que emitiu un informe favorable no que, ademais, felicitaba aos promotores polo traballo realizado e a “excelente” calidade do proxecto.
Case catro anos despois de que a proposta galega botara a andar, a declaración oficial da nova reserva da biosfera por parte do Consello Internacional de Coordinación do Programa M&B entrará en vigor tras a súa publicación no Boletín Oficial do Estado, ao tratarse de unha area protexida por instrumentos internacionais.
Mais información:
https://www.xunta.gal/notas-de-prensa/-/nova/61788/unesco-declara-ribeira-sacra-serras-oribio-courel-septima-reserva-biosfera-galicia?langId=gl_ES
https://es.unesco.org/news/unesco-redobla-esfuerzos-pro-conservacion-biodiversidad-designacion-20-nuevas-reservas-biosfera
